മാണിക്കം ടാഗോർ, ടി എൻ പ്രതാപൻ, രമ്യ ഹരിദാസ്, ജ്യോതി മണി എന്നീ നാല് പേരെയാണ് സസ്പെന്‍റ് ചെയ്തത്. സഭാസമ്മേളനം കഴിയുംവരെയാണ് സസ്പെൻഷൻ. വിലക്കയറ്റത്തിനെതിരെയാണ് എംപിമാർ പ്ലക്കാർഡ് ഉയർത്തി പ്രതിഷേധിച്ചത്. സഭയ്ക്കുള്ളിൽ പ്ലക്കാർഡ് ഉയർത്തരുതെന്ന് സ്പീക്കർ ഓം ബിർല ഇവർക്ക് മുന്നറിയിപ്പ് നൽകിയിരുന്നു. മൂന്ന് മണിക്ക് ശേഷം ചർച്ചയ്ക്ക് അവസരം തരാമെന്നും സ്പീക്കർ വ്യക്തമാക്കിയിരുന്നു. എന്നാൽ ഇത് കേൾക്കാൻ എംപി മാർ കൂട്ടാക്കിയില്ല. പിന്നാലെയായിരുന്നു സസ്പെൻഷനുമായി സ്പീക്കർ മുന്നോട്ട് പോയത്. രാജ്യത്ത് രൂക്ഷമായ വിലക്കയറ്റമാണ്. സാധാരണക്കാരുടെ ജീവിതം ദുസഹമാവുകയാണ്. ഈ കാര്യം ഏറെ കാലമായി പാർലമെന്റിൽ ചർച്ച ചെയ്യണമെന്ന് ആവശ്യപ്പെടുന്നുണ്ട്. എന്നാൽ പാർലമെന്റിൽ അക്കാര്യം പറയാൻ പാടില്ലെന്നും അതിന് സ്വാതന്ത്ര്യമില്ലെന്നുമാണ് പറയുന്നതെന്ന് ടിഎൻ പ്രതാപൻ പറഞ്ഞു. അരിക്കും പാലിനും വരെ ജിഎസ്ടി അധികമായി ഏർപ്പെടുത്തി ജനങ്ങളെ ബുദ്ധിമുട്ടിലാക്കുകയാണ്. ഇതൊക്കെ പറയാനാണ് ജനങ്ങൾ ഞങ്ങളെ ഇങ്ങോട്ടേക്ക് അയക്കരുന്നത്. സഭയ്ക്ക് അകത്തും പുറത്തും ഇനിയും പ്രതിഷേധം തുടരുമെന്നും അദ്ദേഹം കൂട്ടിച്ചേർത്തു.
