പീച്ചി ഡാം റിസർവോയറിൽ ജലനിരപ്പ് ഉയർന്ന സാഹചര്യത്തിൽ ഡാമിന്‍റെ ഷട്ടറുകൾ തുറന്നു. ഇന്ന് രാവിലെ 10 മണിയോടെയാണ് ഷട്ടറുകൾ ഓരോന്നായി ഉയർത്തിയത്. ഓരോ ഷട്ടറുകളും 2.5 സെ.മീറ്റര്‍ വീതം ഉയര്‍ത്തി. 77.18 മീറ്റർ ആയിരുന്നു ഇന്നലത്തെ ജലനിരപ്പ്. ഇത് 76.02 മീറ്റർ എന്ന അപ്പർ റൂൾ കർവ്വിന്‍റെ ജലവിതാനത്തെ മറികടന്നിരുന്നു. ഇതെ തുടർന്നാണ് ഇന്ന് ഡാമിന്‍റെ നാല് ഷട്ടറുകൾ 2.5 സെ.മീറ്റര്‍ വീതം തുറക്കാൻ തീരുമാനമായത്. പീച്ചി ഡാമിന്‍റെ ജലം ഒഴുകിപ്പോകുന്ന മണലിപ്പുഴയുടെ തീരത്തുള്ള എല്ലാ പഞ്ചായത്തുകളിലെ ഉദ്യോഗസ്ഥരും പോലീസ് സംവിധാനങ്ങളും ബന്ധപ്പെട്ട മറ്റ് ഗവൺമെന്‍റ് സ്ഥാപനങ്ങളും പ്രസ്തുത സാഹചര്യത്തെ നേരിടുന്നതിന് സജ്ജരാകണമെന്നും മണലിപ്പുഴയുടെ തീരത്ത് താമസിക്കുന്നവർ ജാഗ്രത പാലിക്കേണ്ടതാണെന്നും അധികൃതർ അറിയിച്ചു.
