സ്വകാര്യ ബസുകൾക്കെതിരെ തൃശൂരില്‍ പോലീസിന്റെ സ്പെഷ്യൽ ഡ്രൈവ്. മദ്യപിച്ച് വാഹനമോടിച്ച ഏഴ് ഡ്രൈവർമാരും അഞ്ച് കണ്ടക്ടർമാരും കസ്റ്റഡിയിലായി. സ്വകാര്യ ബസ്സുകളും പോലീസ് കസ്റ്റഡിയിലെടുത്തു. രാവിലെ ആറുമണി മുതൽ ആയിരുന്നു പരിശോധന. തൃശൂർ നഗരത്തിലെ വടക്കേ ബസ് സ്റ്റാന്‍ന്‍റ് , ശക്തന്‍ ബസ് സ്റ്റാന്‍റ് എന്നിവിടങ്ങള്‍ കേന്ദ്രീകരിച്ചായിരുന്നു പരിശോധന. ഈസ്റ്റ് എസ്.എച്ച്.ഒ ലാല്‍കുമാറിന്‍റെ നേതൃത്വത്തിലുള്ള പോലീസ് സംഘമാണ് പരിശോധന നടത്തിയത്. കാർ യാത്രികനെ ആക്രമിച്ച മൂന്ന് ബസ് ജീവനക്കാരെ ഇന്നലെ വെസ്റ്റ് പോലീസ് പിടികൂടിയിരുന്നു. കൊടുങ്ങല്ലൂരില്‍ ദിവസങ്ങള്‍ക്ക് മുന്‍പ് മാരക മയക്കുമരുന്നായ എം.ഡി.എം.എ സഹിതം രണ്ട് ബസ് ഡ്രെെവര്‍മാരെ അറസ്റ്റ് ചെയ്തിരുന്നു. ഡ്രൈവർമാർ മദ്യപിച്ചെന്ന് കണ്ടെത്തിയതോടെ, ഏഴ് സ്വകാര്യ ബസുകളും പോലീസിടപെട്ട് പിടിച്ചിട്ടു. ജയ്ഗുരു, എടക്കളത്തൂർ, ഹോളി മരിയ, ഭരത്, ശ്രീറാം ട്രാവൽസ്, കൃപാൽ, മൗനം എന്നീ സ്വകാര്യ ബസുകളാണ് പിടിച്ചിട്ടത്. മദ്യപിച്ച് വാഹനമോടിച്ച ഡ്രൈവർമാർക്കെതിരെ കേസ് രജിസ്റ്റർ ചെയ്യുമെന്ന് പോലീസ് അറിയിച്ചു.
